Гандлёвая сетка «Карона» папярэдзіла кліентаў, што скасавала некаторыя варыянты аплаты тавараў праз плацежныя праграмы. Пра гэта паведамляецца на сайце рытэйлера.
«Аплата з дапамогай плацежных праграм Samsung Pay, Apple Pay, Huawеi Pay, Swoo Pay, Garmin Pay, Xiaomi Pay не ажыццяўляецца», — абвясціла кампанія.
Як паведамляецца, для разліку ў касе па-ранейшаму можна выкарыстоўваць фізічную аплатную картку, наяўныя, а таксама плацежны сэрвіс «АПЛАЦІ» або праграму «Белкарт Pay».
З чым звязанае такое рашэнне, не ўдакладняецца. Не выключана, што праблемы выкліканыя санкцыйнымі абмежаваннямі ў дачыненні да банка, чые тэрміналы стаяць у крамах сеткі.
У Беларусі pay-сэрвісы працуюць з 2017 года. Аднак пасля санкцый, уведзеных у 2022 годзе, «прывязаць» да іх стала можна не ўсе карткі беларускіх банкаў.
Цяпер з сэрвісамі кшталту Samsung Pay, Apple Pay працуюць банкі, якія не трапілі пад санкцыі. Таксама ў Беларусі за апошнія тры гады з’явіліся альтэрнатыўныя сэрвісы для аплаты смартфонам. Цяпер на рынку каля 10 варыянтаў аплаты смартфонам.
Усе новыя сэрвісы («Белкарт Pay», Mir Pay, Swoo Pay, Huawei Pay) працуюць толькі з Android і/або Huawei. Для ўладальнікаў айфонаў застаецца па-ранейшаму выключна Apple Pay. Бескантактная аплата з дапамогай праграм даступная ва ўсіх тэрміналах з падтрымкай NFC.
Чытайце таксама
